how to make lipstick at home: ஐந்து கலரில் அட்டகாசமான ஆர்கானிக் லிப்ஸ்டிக், வீட்டில் இருக்கும் பொருள்களே போதும்! – how to prepare natural lipstick at home in tamil

0
15


லிப்ஸ்டிக் என்பது உதட்டை அழகாகவும், கவர்ச்சியாகவும் வைத்திருக்க பயன்படுத்துகிறோம். ஆனால் இதிலும் பலவிதமான நிறங்கள் உண்டு. ஒவ்வொரு நிறங்களிலும் பலவிதமான ஷேடுகளில் கிடைக்கிறது.
அழகு பராமரிப்பில் இயற்கையான பொருள்களை கொண்டு பராமரிக்க விரும்பும் போது லிப்ஸ்டிக் வகைகளையும் வீட்டிலேயே தயாரிக்கலாம். சுத்தமான ஆரோக்கியமான முறையில் எளிதாக தயாரிக்க முடியும். எப்படி தயாரிப்பது என்று பார்க்கலாம். என்னென்ன நிறங்களில் தயாரிப்பது என்றும் தெரிந்துகொள்ளலாம்.

லிப்ஸ்டிக் தயாரிக்கும் முறை

பொதுவாக லிப்ஸ்டிக் தயாரிக்கும் முறை ஒன்று தான். நாம் சேர்க்கும் நிறங்களை பொறுத்து அவற்றை பெறமுடியும். இப்போது செக்க சிவந்த உதடுகளை மேலும் சிவப்பாக காட்டும் லிப்ஸ்டிக் எப்படி தயாரிப்பது என்று பார்க்கலாம்.
தேவை
பீஸ் வேக்ஸ் – 1 டீஸ்பூன்
சியா பட்டர் – 1 டீஸ்பூன்
தேங்காய் எண்ணெய் – 1 டீஸ்பூன்
பீட்ரூட் பொடி – கால் டீஸ்பூன் அளவு
நறுமணம் தரும் எசென்ஷியல் எண்ணெய் – 2 துளிகள்,
சேகரிக்க – மிகச்சிறிய கண்ணாடி பாட்டில் – கடைகளில் கிடைக்கும்.
முதலில் பயன்படுத்தும் பொருள்கள் எல்லாமே தரமானதாக இருக்க வேண்டும் என்பதை உறுதி செய்து கொள்ளுங்கள்.

லிப் பாம் வெளியில் வேண்டாம் வீட்டிலேயே தயாரிக்கலாம்!

எப்படி செய்வது

பீஸ்வேக்ஸ், சியாபட்டர், தேங்காயெண்ணெய் மூன்றையும் உருக்க வேண்டும் எனில் இதை நேரடியாக சூடுபடுத்த கூடாது. டபுள் பாய்லிங்க் மெத்தட் முறையில் சூடுபடுத்த வேண்டும். இந்த மூன்றையும் சிறிய கிண்ணத்தில் சேர்த்து அதை அதைவிட பெரிய பாத்திரத்தின் உள்ளே வைத்து சூடு செய்யவும். இந்த மூன்றும் உருகியதும் இறக்கி அதில் பீட்ரூட் பவுடர் மற்றும் அதனுடன் எசென்ஷியல் ஆயில் சேர்த்து நன்றாக கலக்கவும்.

பவுடர் கட்டியில்லாமல் இருக்க வேண்டும். ஒன்றுக்கு இரண்டு முறை சலித்திருக்க வேண்டும். இதை மெல்லிய வெள்ளை துணியில் சலிப்பதுதான் நல்லது. அனைத்தையும் நன்றாக கலந்து கண்ணாடி பாட்டிலில் சேகரித்து பிறகு ஃப்ரிட்ஜ்ஜில் வைத்து குளிர வைத்து பயன்படுத்தினால் அடர்ந்த சிவப்பு நிற லிப்ஸ்டிக் கிடைக்கும். எளிதாக தயாரிக்க முடியும்.

பீட்ரூட்டை தோல் சீவி நிழலில் உலர்த்தி காய்ந்ததும் மிக்ஸியில் பொடித்தால் அடர்ந்த சிவப்பு நிறம் கிடைக்கும்.
ஆரஞ்சு தோலை நிழலில் உலர்த்தி பொடியாக்கி சலித்து பயன்படுத்தி சேர்க்கலாம். இவை வெளிர் சிவப்பு நிறத்தை தரக்கூடும்.

எலுமிச்சை தோலை நிழலில் உலர்த்தி பொடித்து சலித்து பயன்படுத்தி சேர்க்கலாம். இவை வெளிர் ஆரஞ்சு நிறம் போன்று கொடுக்கும். இதை சேர்க்கும் போது சிட்டிகை மஞ்சள் சேர்க்கலாம்.

அடர்ந்த காபி கொட்டை நிறம் வேண்டுமெனில் இலவங்கபட்டையை பொடியாக்கி சேர்க்கலாம்.

ரோஜா இதழ்களை உலர்த்தி பொடியாக்கி அதை சேர்க்கும் போது பிங்க் நிறம் கிடைக்கும்.

கேரட்டை தோல் சீவி துண்டுகளாக்கி பொடியாக்கி சேர்க்கலாம். இவை ஆரஞ்சு நிறத்தை தரக்கூடும்.

தூங்கும் போது இந்த 6 விஷயம் செய்யுங்க, முகம் ரொம்ப அழகா இருக்கும்!

குறிப்பு
எந்த பொடியை சேர்த்தாலும் அதை நீங்களே தயாரிக்கலாம். ஆனால் அதை மெல்லிய வெள்ளைத்துணியில் சலித்து பயன்படுத்த வேண்டும். அப்போதுதான் லிப்ஸ்டிக் அதிக அடர்த்தியாக இருக்காது.

லிப்ஸ்டிக் தயாரிக்கும் முறை

பொடி தயாரிக்க நேரம் இல்லையென்றால் இயற்கை முறையில் தயாரிக்கப்படும் ஃபுட் கலர் வாங்கியும் சேர்க்கலாம். இதிலும் பல நிறங்கள் கிடைக்கும்.

இப்படி தயாரிக்கும் லிப்ஸ்டிக் வகைகளை ஃப்ரிட்ஜ்ஜில் வைத்து மூன்று மாதங்கள் வரை பயன்படுத்தலாம். லிப்ஸ்டிக் பிரஷ் கொண்டு பயன்படுத்தவும்.

எல்லாம் சரி இந்த லிப்ஸ்டிக் கடைகளில் கிடைப்பது போன்று நல்ல பளபளப்பை தருமா என்று கேட்கிறீர்களா? பளபளப்பை காட்டிலும் உதடை மென்மையாக வைத்திருக்கும். ஆரோக்கியமாகவே. அதோடு உதடு சுருக்கம் இல்லாமல் லிப்ஸ்டிக் போடாமலே அழகாக தெரியும். இதைவிட வேறு என்ன வேண்டும்.